Балаҕан ыйын 16 күнүгэр күүтүүлээх «Көмүс күһүн» дьаарбаҥка ыытылынна. Барыта 13 нэһилиэк олохтоохторо бурдук ас арааһын, сайын устата үүннэрбит оҕуруот аһын эгэлгэтин, күөх тайҕа быйаҥа — сир аһын араас көрүҥүн аҕалан дьоҥҥо сэргэҕэ үөрдэ — көтүтэ атыылаатылар. Ону таһынан талба талааннаах кыттааччыларбыт киһини сөхтөрөр илии оҥоһуктара дьаарбаҥканы киэргэттилэр.
Үгэскэ кубулуйбут «Бааһына бухатыыра» куонкуруска саамай улахан хортуосканы быһаардылар. 1,010 киилэ ыйааһыннаах Винокурова Эмилия оҕуруотун хортуоската кыайыылааҕынан таҕыста.
Долгутуулаах «Күһүн бэлэҕэ» бириэмэҕэ түргэннии оҕуруот аһыттан сокууска оҥоруутун күрэҕэр 3 эдэр ийэ илин — кэлин түһүстүлэр. Көрөөччү дьүүллээһининэн кыайыылаахтар быһаарылыннылар. I миэстэ -Ангелина Волкова, II миэстэ — Татьяна Бережнева, III миэстэ — Туяра Гаврильева буоллулар.
Күөх сайыммытын атаарар «Көмүс күһүн» тэрээһиммитигэр түмсүбүт нэһилиэкпит көхтөөх дьонугар — сэргэтигэр истиҥ махталбытын биллэрэбит! Инникитин да бу курдук өлгөм астаах сандалылаах байылыат олохтоох буолуҥ!